TANJUNG MANIS: Pengeran Perintah Sarawak ngemansangka Tanjung Manis patut direbut rayat dikena nyungkak tikas ekonomi sida empu.
MP Tanjung Manis Yusup Abdul Wahab madah, penyampat pemansang Tanjung Manis berindik ari pengeran Perintah Nengeri ti deka ngangkatka kandang menua nya nyadi sebuah palan ekonomi tumbuh ba wilayah tengah Sarawak.
Pengeran nya ku iya nyata dipeda pengudah Tanjung Manis jampat berubah dalam timpuh pandak.
“Bemacham aktiviti ekonomi enggau industri udah ditumbuh ba Tanjung Manis baka kayu ramu, industri halal, dok kapal, berikan tasik dalam, sawit beraban, minyak enggau gis, akuakultur enggau nginjin pemakai ngerichahka agi pemansang ba ditu.
“Nengah aktiviti tu, pemansang Tanjung Manis ulih nempa pengawa puang enggau dagang ngagai peranak menua tu sereta nyungkak agi tikas ekonomi peranak ditu,” ku iya lebuh pengawa bejadika Hari Tanjung Manis 2019 kemari.
Ku iya, pemanah kaul Perbadanan Kemajuan Perusahaan Kayu Sarawak (PUSAKA) mujur ngubah rampa Tanjung Manis ti sebedau tu semina menua ulu, jauh ari mengeri.
Atur pengawa berenggat ku iya ngangkatka Tanjung Manis mansang nyadi hab industri baru ti nyediaka bemacham perengka guna ti ulih nyungkak ekonomi rayat.
Pia mega ku iya, nengah bemacham sambung jalai ti bisi disedia nyengkaum darat, ai enggau langit, mengeri baru tu ulih dilawa ari Sibu, Sarikei enggau Mukah ngujungka iya nyadi pilih pemadu engkeman pemeranak puku.
“Berindik ari nya, aku ngansak peranak ngerebut peluang tu memanah. Bala pedagang mega tau ngerebut peluang pemadu manah tu dikena ngangkatka dagang sida empu.
“Nya alai, anang semina tukang ngemata aja tang patut ngena awak tu ngangkatka tikas idup nengah bemacham peluang baru ti disediaka perintah tu,” ku iya.
Yusuf Abdul Wahab
No comments:
Post a Comment