KUCHING : Miring tu siti ari daya idup dikemeran bansa Iban kenyau kenyau ari kelia nyentuk sehari tu.
Pengawa miring tu dikena kitai nibarka jaku tesau tauka chara kitai ngangau lalu betemu enggau petara, sebayan, antu, bunsu jelu sereta orang panggau libau, tebal agi enda ulih ditela ngena kata kasar.
Nadai ngira sida ke udah mindah lalu diau mendam ba mengeri tauka sida ti agi beridup ba rumah panjai endang agi ngemeranka pengawa lama tu.
NALI ADAT ASAL IBAN
Sikin Sigih, peranak asal Katibas Song, Kapit madah, sida menyadi endang ari mit meda pengawa miring tu dikereja sida serumah. Iya empu diajar niang apai diri chara nyendiaka rengka piring enggau ripih pengawa maya miring.
Penatai taun baru chukup besai reti ba bansa kitai ku Sikin, ukai semina ngemai reti mungkal taun idup ti baru tang mega kelai ngepunka singkang sekalika nampung juluk ati ti apin dijapai ba taun sebedau tu tauka niat pulaika pemaik sida sebilik.
Ku Sikin, taja udah diau ba mengeri laban nitihka periuk asi, tang pengawa miring endang dikereja belama tetiap kali bisi pengawa begunaka piring diayan.
“Baka nya mega lebuh ngintu Taun Baru 2019 tu tadi, kami sebilik nesau enggau ngangauka bala bakih ti diau besemak datai ngulu pengawa seraya sida ke tau jari tauka kereja menyana enggau bepenau gawa dipaduka megai piring.
“Niat kitai endang deka minta diri sebilik diau gerai nyamai, chelap lindap, likun ngereja pengawa enggau diberi berekat sereta pemujur,” ku Sikin.
RINTAI: Rengka piring ti udah dibagi enggau diripih nitihka ripih pengawa miring taun baru.
LALAU IDUP
Ngelansa pengawa miring tu, amat petara ti dikangau kitai maya miring enda datai nyengenda tubuh tauka nyenggala dipeda mata kasar, tang sida ti ngempu pengawa deka bisi kenyap, bisi kelai tauka ulih ngasai.
“Ari biau, ari leka kangau, ari sampi enggau niat ati maya miring, petara tauka bunsu antu ti dikangau deka datai makai piring.
“Penatai sida ti dikangau ari menua sebayan, panggau libau tu enda datai tubuh murus dan dikeandal nangkup leka biau lalu deka meri ubat, sakang, serangkap genap pengaruh ke gembar tubuh enggau ke bukai.
“Nya kebuah, aku berani mansutka penemu madah pengawa miring tu nadai pulaika penyai, pengerusak enggau penanggul ngagai bansa kitai.
“Ni bagi pengaya, penuduk, pangkat enggau peninggi ikas pemandai ba pelajar sekula, kitai bansa Iban patut anang muai pengawa miring tu, ti ditampung ari peturun aki ini kitai munya.
“Indah bansa bukai ti bisi pengarap sida empu mega rindu meda sereta bisi ati belajar miring lebuh sida ngulu pengerami tauka gawai ba rumah panjai ti diintu bansa kitai.
“Nadai kebuah kitai bansa malu nali pengawa asal tu. Nama kebuah kitai ngambi diri Iban tang nyau enggai miring?” ku Sikin.
MASA PETARA: Ai pedara dikena ngepunka pengawa dikena masa enggau ngelalu penatai bala pengabang baka petara, bunsu antu, sebayan enggau ke bukai.
RENGKA PIRING, RIPIH MIRING
Ku Sikin nampung, rengka piring enggau ripih miring endang meruan ditali kelebih agi peranak tungaka Batang Rajang baka dikemeran sida serumah.
“Daun sirih, buah pinang puda, kapu, semakau, daun ruku apung, penganan tempa, sagun, letup tauka rendai, asi pulut dilulun dalam ruas, darah manuk, siku manuk lanjau dikena miau piring.
“Lalu minyak inyak dikena masu tunjuk sebedau megai piring, telu manuk segala enggau ai tuak kena muai pedara enggau kena miring.
“Tu utai ke enda tau enda, ukai ga bisi pemali besai tang dikena masa pengawa bansa kitai, nitihka ajar sida ke tuai laban sida dulu agi nemu pemesai reti pengawa tu.
“Pia mega kitai ditangkan enda bekenaka kereban plastik endur nyimpan rengka piring, pemadu manah ngena chapak seputih, tabak temaga enggau kereban bukai,” ku Sikin ngelansa.
BEBASAKA RIPIH PIRING
Nangkan nya, kitai mega dilalau anang semina ngudahka pengawa aja maya megai piring tauka miring. Kebuah pia ku Sikin, endang bisi lebas ba semua rengka enggau ripih pengawa tu.
“Anang ngena manuk dagin tauka indu manuk dikena miau piring. Bisi kebuah sida ke tuai ngena manuk lanjau.
“Pia mega anang ngena buah pinang ti ditanam raban Kaunsil Kandang Menua ngelagu tisi jalai laban nya ukai buah pinang chulin kitai Iban.
“Anang mabuk beterising maya miring laban ubah baka tu ngayanka kitai enda bebasaka pengawa enggau petara ti dikangau.
“Semua utai tu diajar enggau nunda pengawa sida ke tuai lalu minta apun enti pekara dilansa bisi bebida, bisibil penemu enggau ripih kitai miring laban lain ai, lain mega atur pengawa kitai tang tuju tetap sama,” ku Sikin.
NALI ADAT: Sida ti dipadu megai piring berengkah miring.
NGELEMPAIKA PENGANDAL
Taja pia ku Sikin, kitai bisi pengirau rebak baru diatu nadai entu angkunka adat asal sereta enggai kiruh belajar ari sida ke tuai.
“Suah agi kitai meda rebak kemaya hari enda nemu reti pengawa miring kelebih agi sida ke udah lama diau ba mengeri lalu jarang tauka enda kala mulaika diri ke menua.
“Ambika chunto, sida ti bekereja ba menua bukai lalu manggai bepuluh taun nadai pulai ke menua. Bisi mega sekeda, nyau bujang dara bala anak baru sida bisi rembus pulai nemuai.
“Enti bala anak enda diajar ari umur biak pasal pengawa miring tu, tentu iya deka lenyau diseruyut jeman jemah,” ku Sikin mantaika pengirau diri.
Berindik ari nya, Sikin bisi amat pengandal enggau meransang sapa bagi ti nemu enggau ngemeranka pengawa asal tu tau besaup bepadah sereta ngajar sida ke nembiak ngambika adat tu seruran ditali rebak dudi.SuaraSarawak
No comments:
Post a Comment