KANOWIT: Serakup Dayak Sarawak (PEDAS) Sibu mujur ngintu Gawai Sandau Hari begulai enggau dua iku panglima Dayak ari menua Baleh, Kapit sereta bala bukai betubuh urung 200 iku.
Gawai betuaika Ketuai Pampang PEDAS Sibu, Mathew Mudai madah, pengawa serak tu mujur amat lalu nerima timbal chukup manah ukai semina bala kaban serakup aja tang peranak menua bukai mega.
“Nyadi pengawa kami sehari tu, dipuntang enggau jaku terang, iya ke bisi (pengaruh) meri, iya ke nadai tau ngambi lalu tuju iya ngambika bela besaup ngibun adat lama ti dikembuan aki ini.”
“Sekeda bala ke bisi datai ari Mukah, Selangau, Tanjung Manis, Balingian, Sibu, Kanowit, Durin, Julau, Song, Kapit enggau menua. Tabi puji ke sukung semua bala.”
“Kitai empu enda ngadang pemanah timbal diterima ari mensia mayuh baka tu taja kitai nibarka jaku tesau kandang dua minggu sebedau gawai nyadi,” ku Mathew.
Sandau Hari 1 NGELALU: Bala pengabang ti datai ngulu Gawai Sandau Hari dilalu ngena adat basa.
Pengawa lanchar diatur ba rumah siku ari kaban serakup, Moses Entinggi ba Kampung Hilir Kanowit, ujung minggu tu tadi.
Bala ke datai mega bengepan Iban, sida ke lelaki bebaju burung, beketapu silung enggau ngena lelanjang seraya sida ke indu ngerasukka rawai.
NUNDA, NGIBUN ADAT LAMA
Ku Mathew, pengawa sida sebuat sehari nya endang nunda ripih Gawai Sandau Hari baka ti ditampung ari sida ke tuai.
Nadai niat bukai kelimpah ari deka ngibun enggau nali adat lama kitai bansa ngambika enda punas ngapa jemah.
“Pengawa betuaika aku empu, nitihka tusun adat kitai Iban, bisi orang ti nyenggala megai babi, meri babi mandi, bebanchakka babi enggau nela atau babi endang chukup intu enggau ripih.
Sandau Hari 2 MIRING: Piring tubuh dikena ngepunka pengawa sebedau nyabang enggau ngambi sakang, pengaruh enggau penemu bukai.
“Bisi tiga bansa berau dikena rambau atur gawai tu baka berau burak, berau kunyit enggau berau kuning, ti ditabur lebuh gawai nyadi tauka maya mansutka leka sampi. Sida ti ngempu gawai mega betabuh ti ngiring penatai bala ti miring.
“Babi mati urung pukul 11 pagi pengudah dipandi tumu pagi lalu dipiring sereta dibiau. Atau babi ditela lalu dibacha sida ti tau jari enggau bepenau, baka sekali tu kitai ngelempaika pengandal megai pengawa ngagai panglima Iban ari Baleh.
“Seduai tu endang beberita amat ba menua Baleh, peturun ari menua sepiak lalu seduai diau mendam ba Baleh, Kapit din. Kitai chukup temegah ati nerima penatai seduai.
“Nya kebuah kami ti ngempu pengawa nadai ati sanggu enggau kakang ngandalka seduai iya ngiring gawai besai kitai bansa sekali tu,” ku Mathew ngelansa.
NGADING PENEMU
Sandau Hari 3
BIAU: Manuk labang dikena miau piring gembar tubuh ti udah tembu diintu.
Batang tuju kami sebuat ku Mathew deka nerenakka ulah angkunka adat lama kitai Iban seraya ngulihka sanding penemu enggau penerang silik pasal pesaka lama ti diibun sida ke tuai lalu ditampung peturun orang ke ngibun bilik tuai.
Bisi mega sekeda sida tu bulih penemu ari kenyap tauka diberi antu nyenggenda lalu Gawai Sandau Hari tu dikena kitai muji enggau minta berekat sereta kelai ngelaluka penatai petara.
“Batang pengawa kami endang deka ngibun adat, beduaka penemu enggau ni bagi pemisi bala ke datai enda ditatak ngambika dikunsi enggau disabang pangan diri ngena piring ading.
“Bisi 57 iti piring dibai bala ti betubuh 57 iku beambika penemu, nyabang sakang ari pangan diri sereta beduaka pengaruh nyadika gembar tubuh,” ku Mathew madah nyemetak.
Sandau Hari 4
PIRING GAWAI: Babi digali ba pandung ti digaga ari pua kumbu sebedau pengawa bebanchak enggau nela atau babi dikereja.
DITALI REBAK BIAK
Ku Mathew gawai sekali tu ngemai reti chukup besai kelebih agi ngagai kitai ti agi angkun enggau ngemeranka adat lama.
Kebuah pia ku iya, sebarang adat lama tauka pengarap ba dunya tu tau punas enti enda diibun meruan sereta ditampung ngagai rebak baru.
Nya kebuah rebak baru enda tau enda diajar, dipadah lalu diperansang bisi pengiruh enggau ibuhka pengawa lama baka tu.
“Enti ukai sida tu nampung pengawa aki ini kitai, anang nyebut bansa bukai laban tu kelai enggau pengarap lama kitai ti nyelai enggau ditemu ngasi.
Sandau Hari 5
KENANG JEMAH: Sida ti ngempu gawai begambar bebala mayuh ungkup kenang dudi hari.
“Rebak dudi abis nadai nemu pasal gawai tu, meretika reti iya diintu enggau ripih pengawa sebedau, maya enggau pengudah gawai nyadi, enti sema sida enggai ngemeranka adat tu pengidup,” ku Mathew.
NGERAPIT TANGGAM KAUL
Taja gawai tu diatur pampang Sibu, tang nyauka semua pampang serakup nganjung pengari sida datai meri sukung enggau besaup ngatur sereta ngemujurka pengawa.
“Lantang amat meda kaul serakup bala madi ti datai ari jauh enggau semak. Gawai Sandau Hari tu nyadika pelasar kitai begempuru diri menyadi, nanggam teguh agi sintal kaul bebakih seraya ngemai mensia mayuh ngelala adat lama kitai,” ku iya.
Pia mega ku Mathew, rebak biak enda dikelaung ari pengawa baka tu ngambika sida nemu pemesai reti pengawa enggau bebasaka adat lama sereta sida ke tuai.-SuaraSarawak
No comments:
Post a Comment