James siku ari pengemeran ngaga pantang ke endang udah tebilang ba sitak menua adap ke tengah Sarawak
NADAI nyangka bepun ari pengerindu nero kenyau ari biak diatu pengawa maya lepa nya udah bebali nyadi jalai penatai pemisi.
Pekara tu nyadi ba James Nyulang tang iya ukai nero agi, nyau ngemeranka pengawa ngaga pantang.
Pengalus ukir enggau pengelandik mantang ke dikembuan peranak asal Bintangor tu diatu endang dikelala lebih agi sida ke rindu bepantang tungga sitak tengah.
ALUS…Sekeda ari bekau ukir jari James ke udah digaga iya ngelama tu.
Sida tu ukai semina lelaki tang mega sida ke indu, enda ngira biak tauka tuai, pupu bansa tang ukai muslim.
Ngenang sida ke indu ti bepantang, ku James, maya hari tu enda baka kelia alai suba pengawa bepantang bisi lebas, pantang enda sama enggi sida ke lelaki lalu sida ke indu amat bisi ukir ba tubuh baka ba lengan, jari tang reti iya bebida.
“Kitai ulih nyebut ba rebak baru diatu bepantang maya hari tu siti ‘seni’.
“Nya alai, kitai enda tekenyit agi enti meda sida ke indu diatu nyau bepantang baka sida ke lelaki,” pia ku iya maya dirandau pengarang pemberita apin lama ke udah rambau mantang siku temuai peranak Sibu empu.
James madah, sida ke suah begunaka pengelandik iya bepantang tu endang ari pupu bansa.
SUAH DIPINTA..Entara motif pantang ke suah dipinta bala penguna
“Iya ke udah, kelimpah kitai Iban, aku suah dikangau bakih bukai baka bansa China, Kayan enggau Melanau mantang sida.
“Diatu semua orang rindu bepantang taja pantang ke digaga nya enda sama ukir,” ku iya madah.
Sentang tu, ku James, bansa Iban ti begunaka iya suah agi ngaga ukir lama baka Bungai Terung, ukir Ketam Itit enggau Arak Nyangkam tauka ukir lama ke bukai.
“Ba bansa bukai baka enggi china sida rinduka pantang ukir Jipun enggau pantang moden,” ku iya nerang.
Pengelebih ke bisi ba James iya nya iya nadai kedai tang ‘kedai’ iya ba semua endur, enda ngira dini alai sereta nadai jam tutup buka pukul berapa.
Reti iya sida ke deka bepantang tu betelefon tauka ‘whataps’ ngagai iya dulu.
“Sida ke bepantang suah agi ngasuh aku ke rumah sida tauka sida empu ngelawa aku ke rumah.
“Kelimpah ari nya, bisi mega sida mai aku ngaga pantang ba hotel. Nitihka pengeka sida ke bepantang tu,” pia ku iya.
James tau ditanya tauka whatapps ngagai iya nengah lumur 011-2993 5590.SarawakVoice
FOKUS…James benung fokus belakang mantang siku penguna
No comments:
Post a Comment