SPAOH: Sekeda palan bedaja ba tisi jalai bisi diasuh mindah ngagai palan bukai dikena meri awak ungkup ngemujurka Projek Pan Borne
Siku ari sida ti kala bedaja ba simpang Spaoh, Mae, 60 taun madahka sida diatu udah mindah ngagai siti palan ba seberai rumah panjai Menyalin Asal.
“Kami mindah kitu ari simpang Spaoh udah manggai sebulan lebih ketegal palan lama kami suba direnchah jalai.”
“Taja pia, palan ke diatu ukai palan ti entap laban jalai tu mega kena renchah projek jalai besai, ” ku Mea.
Sekeda ari sida ti bedaja dia mega madahka diri udah berengkah bedaja ba simpang Spaoh kenyau ari taun 2009.
“Rambau nya semina bisi 14 pintu ti bedaja dia. Udah nya, kami bisi diberi orang projek lalu diberi 14 iti mija.
“Orang bukai ti deka nampung kami dia ngaga langkau kediri tang nadai ampit projek ti dulu diberi ngagai kami, ” ku siku ari pedaja dia.
Tampung siku agi ari sida ke bedaja dia, suba bisi 25 pintu bela bedaja ba simpang Spaoh.
Sepengudah sida diasuh mindah, semina tinggal semilan pintu aja agi nampung pengawa bedaja lalu sida ke bukai ngemaduka diri.
Ku iya nambah, maya diasuh mindah, sida nadai nerima pampas tauka tulung dikena sida mindah ngagai palan bedaja ti baru.
“Semua langkau kami ke baru tu digaga kami empu. Lebuh ngererak langkau lama, kami mega ngereja pengawa ngatika diri sebedau mindah kitu.
“Kami nadai nyakal pengawa ngemansangka menua tu. Lebuh diasuh mindah, kami nurut aja laban endang pengawa kami ke bejual,” ku iya nampung.
Sida madah udah suah minta palan bedaja tang lalu nadai kala ditimbal raban bekuasa bekaul.
“Sebedau tu, kami udah diasuh mindah ngagai simpang Layar. Ketegal palan nya ti masuk ke dalam nadai meri mayuh penatai pemisi ngagai kami taja endur nya lantang alai bejual.
“Ba ditu, enti dibida enggau palan ti lama, sigi nadai meri mayuh penguntung ngagai kami. Nyangka ketegal palan tu agi baru sereta enda tentu dipeda ari jalai alun.
“Pengudah tu mega kami diasuh mindah baru ngagai palan ke lama enti sema peminta nya dikemendarka sida,” tampung pia siku ari sida bedaja dia.
Semua sida dia bela madahka pengirau diri enti palan lama enda ulih endur bedaja lalu nadai raban teputarka penanggul ditapi sida laban semina nya aja chara ngulihka belanja.-Suara Sarawak
No comments:
Post a Comment